Sju nye skogområde verna i Vestland
Den 16. desember 2022 vart sju skogområde i Vestland verna av Kongen i statsråd. I dette kartet kan du zoome deg inn til desse sju områda.
Totalt utgjer nytt verneareal om lag 10 300 dekar, og sikrar eit mangfald av artar og viktige naturtypar i skog som vi har eit særleg ansvar for å ta vare på. I kartet kan du sjå avgrensinga av dei nye naturreservata. Trykk på området for å zoome direkte inn, eller bruke pilene heilt nede til høgre i kartet.
01 / 07
1
Buggastrondi, Luster kommune
Området dekkjer heile gradienten frå fjord til fjell langs Lustrafjorden og ligg i nærleiken av andre verneområde. Floraen er artsrik, og det er registrert kravfulle marklevande sopp. Raudlista og truga artar er registrert, og det er potensial for å finne fleire. Verneområdet er på 4 054 dekar.
2
Gulbergnotten, Ullensvang kommune
Vernet gjeld utviding av eksisterande naturreservat med 614 dekar til totalt 6 471 dekar. Reservatet vart også utvida ved frivillig sgkoEtter nyleg vernevedtak om utviding av Gulbergnotten 19. mars 2021 er dette andre utviding av dette naturreservatet. Området består av gamal kystfuruskog med blant anna innslag av grove ospeholt i eit ganske så intakt og stort skogområde.
3
Loftesnes, Sogndal kommune
Arealet dekkjer ein gradient frå lågareliggjande område med rik edellauvskog til høgareliggjande areal med furuskog langs eit vestvendt berg i indre Sogn. Det er registrert både levande og døde store, gamle lindetre med grove dimensjonar. Dei gamle trea har gode førekomstar av sopp-, mose- og lav, og det er stort potensiale for funn av truga, sjeldne og sårbare artar. Området er på 623 dekar.
4
Setråsen og Femanger, Bjørnafjorden kommune
Vernet omfattar ei utviding (med 2 596 dekar til 6 371 dekar) av Setråsen naturreservat nordover til også å omfatta areal kring Femanger. Føremålet med naturreservatet er å ta vare på trua, sjeldan og sårbar natur i form av vestnorsk regnskog, gamal kystfuruskog, rik edellauvskog og bekkekløftmiljø. Naturreservatet har særlege naturverdiar knytt til rike, fuktige skogar og er ein sentral del av kjerneområdet for rik, boreonemoral regnskog i Norge. Området er ein del av eit stort samanhengande skogområde sentralt i Hordaland.
5
Skolten, Gulen kommune
Store delar av området utgjer den vestlege lia langs Brosvikvatnet og har god topografisk variasjon og fleire naturtyperegistreringar. Vernet sikrar viktige naturkvalitetar som bekkekløfter, kystfuruskog, boreonemoral blandingsskog og vestnorsk regnskog. Det er også registrert fleire kravfulle lav- og moseartar knytt til desse naturtypane. Området er på 1 431 dekar.
6
Steinen, Bjørnafjorden kommune
Vernet utgjer ei utviding av eksisterande naturreservat med om lag 649 dekar til 1 889 dekar. Utvidingsområdet omfattar areal som vil binde saman dei to separate areala som vart verna i 2019. Skogen er gamal og naturprega, og består av vestnorsk regnskog, gamal furuskog og rik edellauvskog.
7
Åkre og Vikane, Voss herad
Skogen er blant dei eldste, mest intakte og naturprega i Hordaland. Dette utvidingsområdet har også naturprega skog, men også granplantasjar som Statsforvaltaren nyleg har fjerna. Det er ønskjeleg å få reetablera naturskog i desse felta og såleis styrka dei viktige naturkvalitetane i reservatet. Vernet utgjer ei utviding med 364 dekar til 2 219 dekar.